काठमाडौं, असोज ६, २०८३ मंगलबार १६:२७:४०
जापानमा जारी २० औं एसियन गेम्स २०२६ अन्तर्गत महिला क्रिकेटमा भारतले ऐतिहासिक स्वर्ण पदक जितेको छ। प्रतियोगिताको फाइनल खेलमा चिरप्रतिद्वन्द्वी श्रीलंकालाई १४७ रनको फराकिलो अन्तरले पराजित गर्दै भारतले यस संस्करणमा आफ्नो पहिलो स्वर्ण पदक सुरक्षित गरेको हो। यो विजय भारतीय महिला क्रिकेटका लागि मात्र नभई समग्र भारतीय खेलकुद जगतका लागि एउटा महत्वपूर्ण उपलब्धीका रूपमा दर्ज भएको छ।
जापानको कोरोगी स्पोर्ट्स पार्कमा सम्पन्न उपाधि भिडन्तमा टस जितेर पहिले ब्याटिङ गर्ने निर्णय गरेको भारतले निर्धारित २० ओभरमा ३ विकेटको क्षतिमा २१६ रनको विशाल योगफल खडा गर्यो। भारतीय इनिङ्सको जग ओपनर ब्याटर स्मृति मन्धना र सेफाली बर्माले बलियोसँग बसालेका थिए। मन्धनाले मात्र ४५ बलको सामना गर्दै ५ चौका र ७ गगनचुम्बी छक्कासहित ७९ रनको विष्फोटक पारी खेलिन्। उनको यस दमदार प्रदर्शनले भारतलाई उच्च स्कोरतर्फ उन्मुख गरायो। अर्की ओपनर सेफाली बर्माले पनि ३९ बलमा ४८ रनको महत्वपूर्ण योगदान दिइन्। मध्यक्रममा कप्तान हर्मनप्रित कौरले १९ रन जोड्दा अन्तिम समयमा रिचा घोषले अविजित ४९ रन र भारती फुलमालीले ७ रन बनाएर भारतलाई २१६ रनको चुनौतीपूर्ण लक्ष्यमा पुर्याए। श्रीलंकाका लागि बलिङतर्फ सुगन्धीका कुमारी, काभिसा दिलहारी र चामुन्डी प्राबोधाले समान १-१ विकेट हात पारे पनि भारतीय ब्याटरहरूलाई रोक्न सकेनन्।
भारतले प्रस्तुत गरेको २१७ रनको विशाल लक्ष्य पछ्याएको श्रीलंकाली टोली भारतीय बलरहरूको कसिलो प्रदर्शनसामु निरीह बन्न पुग्यो। श्रीलंकाको पूरै टोली १५.४ ओभरमा मात्र ६९ रन बनाएर अलआउट हुन पुग्यो, जसका कारण भारतले १४७ रनको सहज जित दर्ता गर्यो। श्रीलंकाका लागि कप्तान चमारी अथापाथुले २९ रनको सर्वाधिक व्यक्तिगत स्कोर बनाउनुबाहेक अन्य कुनै पनि ब्याटरले उल्लेख्य योगदान दिन सकेनन्। काभिसा दिलहारीले ११ रन र कौसिनी नुथयाङ्गनाले १४ रन जोडे पनि त्यो जितका लागि पर्याप्त थिएन। श्रीलंकाका कुल ८ ब्याटरले दोहोरो अंकमा रन बनाउन सकेनन्, जसले भारतीय बलिङको प्रभावकारितालाई उजागर गर्दछ।
भारतीय बलिङ आक्रमण निकै प्रभावशाली देखियो। दिप्ती शर्माले शानदार प्रदर्शन गर्दै सर्वाधिक ३ विकेट लिइन्, जसले श्रीलंकाली ब्याटिङ क्रमलाई ध्वस्त पार्न महत्वपूर्ण भूमिका खेल्यो। उनको धारिलो बलिङले श्रीलंकालाई निरन्तर दबाबमा राख्यो। सेफाली बर्मा, श्रेयंका पाटिल र श्री चरानीले पनि २-२ विकेट लिएर दिप्तीलाई उत्कृष्ट साथ दिए। यसरी सामुहिक बलिङ प्रदर्शनले भारतलाई फराकिलो जित दिलाउन मद्दत पुग्यो।
यो स्वर्ण पदक २० औं एसियन गेम्समा भारतले जितेको पहिलो स्वर्ण हो। यस जितसँगै भारतले हालसम्म कुल ७ पदक हात पारेको छ। महिला क्रिकेटबाट प्राप्त यस स्वर्ण पदकका अतिरिक्त भारतले ४ रजत पदक र २ कास्य पदक पनि प्राप्त गरिसकेको छ। महिला क्रिकेटमा प्राप्त यो ऐतिहासिक स्वर्ण पदकले भारतीय खेलकुदको प्रतिष्ठा थप बढाएको छ र आगामी खेलहरूका लागि समेत उत्साह थपेको छ।
