पोखरा : पर्यटकीय राजधानी पोखरामा १२ औं अन्तर्राष्ट्रिय योग दिवस भव्यताका साथ मनाइएको छ। भारतीय राजदूतावासको आयोजनामा पोखरा रङ्गशालामा आयोजित बृहत् योगाभ्यास कार्यक्रममा गण्डकी प्रदेशका मुख्यमन्त्री सुरेन्द्रराज पाण्डे, नेपालका लागि भारतीय राजदूत नवीन श्रीवास्तवसहित हजारौंको संख्यामा पोखरेली नागरिक तथा योगप्रेमीहरूको उत्साहजनक सहभागिता रहेको थियो।
यस वर्ष ‘स्वस्थ उमेरका लागि योग’ भन्ने मूल नाराका साथ विश्वभर यो दिवस मनाइएको हो। संयुक्त राष्ट्र संघले जुन २१ लाई अन्तर्राष्ट्रिय योग दिवसका रूपमा घोषणा गरेपश्चात् सन् २०१५ देखि विश्वभर यो दिवस मनाउन थालिएको छ। पोखरामा भारतीय राजदूतावासको अग्रसरतामा यो चौथो पटक योग दिवस मनाइएको हो, जसले दुई देशबीचको सांस्कृतिक आदानप्रदान र जनस्तरको सम्बन्धलाई थप सुदृढ बनाएको छ।
बिहानैदेखि पोखरा रङ्गशालामा जम्मा भएका सहभागीहरूले प्रशिक्षित योग गुरुहरूको निर्देशनमा विभिन्न आसन र प्राणायामको अभ्यास गरेका थिए। कार्यक्रमको वातावरण शान्त, स्फूर्तिदायक र ऊर्जावान् बनेको थियो, जहाँ हरेक उमेर समूहका व्यक्तिहरूले योगको महत्व आत्मसात गर्दै अभ्यासमा लीन भएका थिए।
कार्यक्रमपश्चात् पत्रकारहरूसँग कुरा गर्दै गण्डकी प्रदेशका मुख्यमन्त्री सुरेन्द्रराज पाण्डेले स्वस्थ जीवन, तन्दुरुस्ती र अनुशासनका लागि योग अपरिहार्य रहेको बताए। उनले योगले शारीरिक मात्र नभई मानसिक र आध्यात्मिक स्वास्थ्यमा समेत सकारात्मक प्रभाव पार्ने उल्लेख गर्दै यसलाई दैनिक जीवनशैलीको अभिन्न अंग बनाउनुपर्नेमा जोड दिए। मुख्यमन्त्री पाण्डेले आधुनिक जीवनशैलीका कारण उत्पन्न विभिन्न स्वास्थ्य समस्याहरूको समाधानमा योग प्रभावकारी माध्यम बन्न सक्ने धारणा व्यक्त गरे।
भारतीय राजदूतावासका फस्र्ट सेक्रेटरी वशिष्ठ नन्दनले कार्यक्रममा उपस्थित सबै पोखरेलीलाई स्वागत गर्दै योग दिवसको सफलताका लागि आभार व्यक्त गरे। उनले यस्ता कार्यक्रमहरूले भारत र नेपालबीचको ऐतिहासिक, सांस्कृतिक र जनस्तरको सम्बन्धलाई अझै मजबुत बनाउन महत्वपूर्ण भूमिका खेल्ने विश्वास व्यक्त गरे। नन्दनले योग कुनै धर्म वा सम्प्रदाय विशेषको नभई मानव कल्याणका लागि विकसित एक प्राचीन विज्ञान र जीवनशैली भएको बताए। उनले योगाभ्यासले तनाव कम गर्न, एकाग्रता बढाउन र समग्रमा खुसी जीवन जिउन मद्दत गर्नेमा जोड दिए।
अन्तर्राष्ट्रिय योग दिवसको अवसरमा पोखरामा आयोजित यो कार्यक्रमले योगको विश्वव्यापी स्वीकार्यता र यसको बढ्दो लोकप्रियतालाई उजागर गरेको छ। यसले नेपाली समाजमा पनि योगप्रतिको चेतना अभिवृद्धि गर्न र स्वस्थ जीवनशैली अपनाउन प्रेरित गर्न महत्वपूर्ण योगदान पुर्याएको छ। पोखराको रमणीय प्राकृतिक सौन्दर्य र स्वच्छ वातावरणमा सामूहिक योगाभ्यासले सहभागीहरूलाई विशेष अनुभूति प्रदान गरेको थियो, जसले योगको महत्वलाई थप पुष्टि गरेको छ।
योगाभ्यासपछि सहभागीहरूले योगले प्रदान गर्ने शान्ति, स्फूर्ति र सकारात्मक ऊर्जाको अनुभव साटासाट गरेका थिए। यस प्रकारका कार्यक्रमहरूले भविष्यमा पनि भारत र नेपालबीचको सांस्कृतिक सम्बन्धलाई अझ प्रगाढ बनाउँदै जनस्तरमा सद्भाव र सहकार्यको भावना अभिवृद्धि गर्ने अपेक्षा गरिएको छ।
