शिक्षा, विज्ञान तथा प्रविधि मन्त्रालयले प्राविधिक शिक्षा तथा व्यावसायिक तालिम परिषद् (सिटिइभिटि) को एकेडेमिक काउन्सिलमा सूचना प्रविधि, उद्योग, स्टेम शिक्षा तथा नर्सिङ-जनस्वास्थ्य क्षेत्रका चार जना विशिष्ट विज्ञहरूलाई सदस्यका रूपमा मनोनयन गरेको छ। यो मनोनयन प्राविधिक तथा व्यावसायिक शिक्षालाई समसामयिक बनाउँदै राष्ट्रिय आवश्यकता र अन्तर्राष्ट्रिय मापदण्डसँग जोड्ने रणनीतिक कदमका रूपमा लिइएको छ।
मन्त्रालयले मनोनयन गरेका विज्ञहरूमा सूचना प्रविधि तथा डिजिटल नीति विज्ञ डा. अमृता शर्मा, नेपाल उद्योग परिसंघका अध्यक्ष विरेन्द्र राज पाण्डे, कर्खानाका सह-संस्थापक तथा स्टेम शिक्षा विज्ञ डा. दिपेश्वर मान श्रेष्ठ र नर्सिङ तथा जनस्वास्थ्य क्षेत्रकी विज्ञ प्रमिला राना हुनुहुन्छ। यी व्यक्तित्वहरूको नियुक्तिले सिटिइभिटिको शैक्षिक तथा प्राज्ञिक नेतृत्वलाई थप सुदृढ बनाउने अपेक्षा गरिएको छ।
सिटिइभिटिको एकेडेमिक काउन्सिल परिषद्को शैक्षिक र प्राज्ञिक गतिविधिहरूको प्रमुख नेतृत्वदायी निकाय हो। यसले पाठ्यक्रम विकास, नयाँ शैक्षिक कार्यक्रमहरूको स्वीकृति, शैक्षिक गुणस्तर सुनिश्चितता, मूल्याङ्कन प्रणालीको परिमार्जन तथा प्राविधिक एवं व्यावसायिक शिक्षाको दीर्घकालीन नीतिगत दिशा निर्धारणमा महत्त्वपूर्ण भूमिका खेल्दै आएको छ। विभिन्न क्षेत्रका विज्ञहरूको सहभागिताले काउन्सिलको निर्णय प्रक्रियालाई अझ बढी व्यावहारिक र प्रभावकारी बनाउनेछ।
मनोनित सदस्यहरूमध्ये डा. अमृता शर्मा सूचना प्रविधि, डिजिटल रूपान्तरण, डिजिटल अर्थतन्त्र तथा सार्वजनिक नीतिका क्षेत्रमा सक्रिय अनुसन्धानकर्ता तथा नीतिगत विज्ञका रूपमा स्थापित हुनुहुन्छ। सूचना तथा सञ्चार प्रविधि क्षेत्रमा रोजगारीयोग्यता विषयमा विद्यावारिधि हासिल गर्नुभएकी उहाँले सूचना प्रविधि उद्योगको विकास, डिजिटल सीप, सेवा निर्यात तथा नीतिगत सुधारका विषयमा गहन अध्ययन तथा अनुसन्धान गर्नुभएको छ। उहाँको नेतृत्वमा सञ्चालित ‘अनलिसिङ आईटीः एड्भान्सिङ नेपाल्स डिजिटल इकोनोमी’ अध्ययनले नेपाललाई सूचना प्रविधि सेवा निर्यातको प्रमुख गन्तव्यका रूपमा विकास गर्न सकिने सम्भावना औँल्याउँदै त्यसका लागि आवश्यक नीतिगत सुधार, दक्ष जनशक्ति विकास र निजी क्षेत्रसँगको सहकार्यमा ठोस सुझावहरू प्रस्तुत गरेको थियो। उहाँको अनुभवले सिटिइभिटिको पाठ्यक्रमलाई आधुनिक प्रविधिसँग जोड्न मद्दत पुग्नेछ।
त्यसैगरी, नेपाल उद्योग परिसंघका अध्यक्ष विरेन्द्र राज पाण्डे निर्माण, पूर्वाधार तथा औद्योगिक क्षेत्रका एक स्थापित उद्यमी हुनुहुन्छ। इन्जिनियरिङ पृष्ठभूमिका पाण्डेले तीन दशकभन्दा बढी समयदेखि निर्माण व्यवसाय, पूर्वाधार विकास तथा निजी क्षेत्रको नेतृत्व गर्दै आउनुभएको छ। उहाँको उद्योग क्षेत्रको गहन अनुभवले प्राविधिक शिक्षालाई उद्योगको वास्तविक आवश्यकता, उत्पादन प्रणाली र श्रम बजारसँग अझ प्रभावकारी रूपमा जोड्न महत्त्वपूर्ण योगदान पुग्ने अपेक्षा गरिएको छ। यसले प्राविधिक जनशक्तिको उत्पादनलाई उद्योगको मागअनुरूप बनाउन सहयोग गर्नेछ।
कर्खानाका सह-संस्थापक डा. दिपेश्वर मान श्रेष्ठले अमेरिकाको टफ्ट्स विश्वविद्यालयबाट स्टेम शिक्षामा विद्यावारिधि हासिल गर्नुभएको छ। नेपालमा विज्ञान, प्रविधि, इन्जिनियरिङ, कला तथा गणितमा आधारित व्यावहारिक सिकाइ, शिक्षकको व्यावसायिक क्षमता विकास, ‘मेकिङ’ संस्कृतिको प्रवद्र्धन तथा नवप्रवर्तनमुखी शिक्षाको विस्तारमा उहाँले अतुलनीय योगदान दिँदै आउनुभएको छ। उहाँको अनुभवले सिटिइभिटिको प्राविधिक शिक्षालाई सिर्जनशीलता, अनुसन्धान र उद्यमशीलतासँग जोड्न मद्दत पुग्ने विश्वास गरिएको छ, जसले विद्यार्थीहरूमा समस्या समाधान गर्ने क्षमताको विकास गर्नेछ।
नर्सिङ तथा जनस्वास्थ्य क्षेत्रकी विज्ञ प्रमिला रानाले भारतबाट नर्सिङमा स्नातकोत्तर उपाधि हासिल गर्नुका साथै नेदरल्यान्ड्सको वागेनिङ्गेन विश्वविद्यालयबाट स्वास्थ्य तथा समाज विषयमा फेलोसिप पूरा गर्नुभएको छ। हाल नेपाल रेडक्रस सोसाइटीमा क्लिनिकल कोअर्डिनेटरका रूपमा कार्यरत उहाँले यसअघि सेभ द चिल्ड्रेन, नर्भिक इन्टरनेशनल अस्पताल लगायत विभिन्न राष्ट्रिय तथा अन्तर्राष्ट्रिय संस्थामा जनस्वास्थ्य, नर्सिङ सेवा, आपत्कालीन प्रतिकार्य तथा वास (WASH) कार्यक्रमको नेतृत्वदायी जिम्मेवारी सम्हालेका थिए। स्वास्थ्य तथा प्राविधिक शिक्षामा उहाँको अनुभवले स्वास्थ्य क्षेत्रका दक्ष जनशक्ति उत्पादन र व्यावहारिक शिक्षाको गुणस्तर अभिवृद्धिमा विशेष योगदान पुग्ने अपेक्षा गरिएको छ।
सूचना प्रविधि, उद्योग, स्टेम शिक्षा तथा स्वास्थ्य क्षेत्रका यी अनुभवी व्यक्तित्वहरूको सहभागिताले सिटिइभिटिको एकेडेमिक काउन्सिललाई बहुआयामिक विशेषज्ञता प्रदान गर्ने विश्वास गरिएको छ। यस मनोनयनले प्राविधिक तथा व्यावसायिक शिक्षालाई आधुनिक प्रविधि, उद्योगको आवश्यकता, नवप्रवर्तन र श्रम बजारसँग थप प्रभावकारी रूपमा जोड्दै गुणस्तरीय तथा रोजगारमुखी शिक्षा प्रणाली विकासमा महत्वपूर्ण भूमिका खेल्ने निश्चित छ।
