तस्बिर स्रोत, Reuters
रुसले युक्रेनको राजधानी किएभमा शृङ्खलाबद्ध बलिस्टिक क्षेप्यास्त्र प्रहार गर्दा एक जनाको मृत्यु भएको छ भने कम्तीमा १४ जना घाइते भएका अधिकारीहरूले बताएका छन्। युक्रेनी राष्ट्रपति भोलोदिमिर जेलेन्स्कीले किएभमा भएको यस आक्रमणलाई रुसले युक्रेनमाथि पूर्णस्तरको आक्रमण सुरु गरेयताकै “सबैभन्दा ठूलोमध्येको” बलिस्टिक हमला भनेका छन्। किएभ क्षेत्रका विभिन्न स्थानहरूमा रातभरि भएका यी आक्रमणहरूले व्यापक क्षति पुर्याएको छ।
युक्रेनी वायुसेनाका अनुसार, रुसले पछिल्लो आक्रमणमा इस्कन्दर र हाइपरसोनिक जिर्कोन क्षेप्यास्त्र लगायतका विभिन्न प्रकारका ४१ वटा क्षेप्यास्त्र प्रयोग गरेको थियो। युक्रेनको हवाई प्रतिरक्षा प्रणालीले तीमध्ये १८ वटा क्षेप्यास्त्र र १०८ वटा ड्रोनलाई सफलतापूर्वक निस्तेज पारेको जनाएको छ। किएभका मेयर भिताली क्लित्स्कोले आवासीय र गैरआवासीय दुवै किसिमका भवनहरूमा क्षति पुगेको आइतवार पुष्टि गरेका छन्। आक्रमणमा एक सुपरमार्केट र एक छात्रावासमा पनि ठूलो क्षति पुगेको छ भने दुई वटा गोदाममा लागेको आगो निभाउने प्रयास जारी छ।
किएभमा भएको यो रुसी आक्रमण युक्रेनले रुसका महत्त्वपूर्ण निशानाहरूमा शृङ्खलाबद्ध ड्रोन हमला गरेको भोलिपल्ट भएको हो। अघिल्लो दिन युक्रेनले रुसको सबैभन्दा ठूलो अनलाइन खुद्रा विक्रेता कम्पनी वाइल्डबेरीजका दुई वटा छुट्टाछुट्टै गोदाममा ड्रोन आक्रमण गरेको थियो, जसमा आठ जनाको मृत्यु भएको थियो भने ६२ जना घाइते भएका थिए। राष्ट्रपति जेलेन्स्कीले यी आक्रमणहरू ड्रोन उत्पादनका लागि प्रतिबन्धित उपकरणहरू आपूर्तिमा प्रयोग गरिएका स्थानहरूलाई लक्षित गरी गरिएको दाबी गरेका छन्। ‘रुसी अमेजन’ भनेर चिनिने वाइल्डबेरीजको सन् २०२६ को फोर्ब्स सूची अनुसार करिब १२.६ अर्ब अमेरिकी डलर मूल्याङ्कन गरिएको छ।
तस्बिर स्रोत, Reuters
युक्रेनी सेनाले ब्ल्याक सी (काला सागर) मा रहेका दुई वटा रुसी तेल ट्याङ्करमा ड्रोनबाट प्रहार गरेको जनाएको थियो। काजकस्तानबाट ब्ल्याक सी हुँदै रुससम्म तेल ढुवानी गर्न प्रयोग हुने बन्दरगाहको टर्मिनलमा आक्रमण भएको पाइपलाइन सञ्चालकले पुष्टि गरे पनि कुनै मानवीय क्षति वा तेल चुहावट नभएको बताएको छ। यसबाहेक, रुसको दक्षिणपश्चिमी स्ताभ्रोपुल क्षेत्रमा पनि ड्रोन आक्रमणका कारण एक औद्योगिक पार्कमा आगलागी भएको थियो।
युक्रेनले हालै रुसको महत्त्वपूर्ण ऊर्जा पूर्वाधारमाथि ड्रोन आक्रमणहरू तीव्र बनाएको छ। यी आक्रमणहरूले रुसमा इन्धन अभावको समस्या निम्त्याएको दाबी गरिएको छ। युक्रेनी अधिकारीहरूले यस महिनाको सुरुमा रुसको तेल प्रशोधन क्षमताको करिब ४३ प्रतिशत हिस्सा “निष्क्रिय बनाइएको” दाबी गरेका थिए, यद्यपि यो दाबी बीबीसीले स्वतन्त्र रूपमा पुष्टि गरेको छैन। मस्कोले २०२२ को फेब्रुअरीमा सुरु गरेको पूर्णस्तरको युद्धका लागि आर्थिक स्रोत जुटाउन इन्धन निर्यात गरिरहेको भन्दै युक्रेनले इन्धन केन्द्रहरूमा गरिने आक्रमणहरू जायज भएको तर्क गर्दै आएको छ। राष्ट्रपति जेलेन्स्कीका अनुसार, एक साताको अवधिमा रुसले युक्रेनविरुद्ध करिब १,४५० वटा ड्रोन, १,६४० भन्दा बढी बम र ९९ वटा विभिन्न प्रकारका क्षेप्यास्त्र प्रयोग गरेको छ, जसले द्वन्द्वको बढ्दो तीव्रतालाई दर्शाउँछ।
