वैशाख ५ गते, काठमाडौं । नेपाल क्रिकेट संघ (क्यान) ले यूएईविरुद्ध घरेलु मैदानमा हुने ऐतिहासिक ‘अन्डर लाइट्स’ टी-२० सिरिजका लागि दीपेन्द्र सिंह ऐरीलाई कप्तानमा चयन गरेको छ। यसअघि नेपालको टी-२०आई र एकदिवसीय दुवै फर्म्याटमा रोहित पौडेलले कप्तानी गर्दै आएका थिए। क्यानले यसपटक टी-२०आई र एकदिवसीयका लागि फरक-फरक कप्तान तोकेको हो। दीपेन्द्र टी-२०आई क्रिकेटमा नेपालको पाँचौं कप्तान बनेका छन्।
यूएईविरुद्ध वैशाख ७ र ८ गते (अप्रिल २० र २१) मा हुने दुई टी-२०आई खेलबाट दीपेन्द्रले सिनियर टोलीको औपचारिक कप्तानी सुरु गर्नेछन्। क्यानले विज्ञप्तिमार्फत दीपेन्द्रलाई टी-२० टोलीको र रोहित पौडेललाई एकदिवसीय टोलीको कप्तान तोकिएको जानकारी गराएको छ। दुवै फर्म्याटका टोलीमा अनुभवी र युवा खेलाडीको सन्तुलित मिश्रण रहेको छ।
दीपेन्द्रले उमेर समूहदेखि घरेलु र फ्रेन्चाइज क्रिकेटमा विभिन्न टोलीको सफल कप्तानी गरिसकेका छन्। लामो समयदेखि नेपालको भावी कप्तानका रूपमा हेरिए पनि सिनियर टिमको कप्तानी जिम्मेवारी पाउन उनलाई केही समय लाग्यो। तत्कालीन कप्तान पारस खड्काले दीपेन्द्रलाई तीव्र गतिमा प्रगति गर्ने खेलाडीका रूपमा उल्लेख गरेका थिए। हालै सम्पन्न आईसीसी टी-२० विश्वकपका क्वालिफायर खेलहरूमा उनले ब्याटिङ, बलिङ र फिल्डिङ तीनै क्षेत्रमा शानदार प्रदर्शन गर्दै नेपाललाई १२ वर्षपछि टी-२० विश्वकपमा पुर्याउन महत्वपूर्ण भूमिका खेलेका थिए। उनले ती खेलहरूमा दुई अर्धशतक समेत प्रहार गरेका थिए।
उनको नेतृत्व क्षमता सानै उमेरदेखि प्रमाणित हुँदै आएको छ। सन् २०१७ मा एसीसी यू-१९ एसिया कपमा दीपेन्द्रकै कप्तानीमा नेपाल यू-१९ टोलीले भारत यू-१९ टिमलाई १९ रनले पराजित गरेको थियो। उक्त खेलमा दीपेन्द्रले ब्याटिङमा सर्वाधिक ८८ रन बनाउनुका साथै ४ विकेट लिएर अलराउण्ड प्रदर्शन गरेका थिए।
घरेलु फ्रेन्चाइज क्रिकेटमा पनि दीपेन्द्र सफल कप्तानका रूपमा स्थापित छन्। सन् २०१९ मा उनकै कप्तानीमा सीवाइसी अत्तरियाले धनगढी प्रिमियर लिग (डीपीएल) को उपाधि जितेको थियो। नेपाल प्रिमियर लिगमा सुदूरपश्चिम रोएल्सको कप्तानी गर्दा उनले टिमलाई दुवै सिजन फाइनलसम्म पुर्याएका थिए। लामो समय नेपाल पुलिस क्लबबाट खेलेका दीपेन्द्रले पछिल्ला वर्षहरूमा पुलिस टिमको समेत नेतृत्व गरेका थिए। सन् २०१८ को एभरेस्ट प्रिमियर लिग (ईपीएल) मा उनी चितवन टाइगर्सका मार्की प्लेअर घोषित भएका थिए। ‘टाइगर’ उपनामले चिनिने दीपेन्द्र मध्यक्रमका भरपर्दा ब्याट्सम्यान र पावर हिटरका साथै उत्कृष्ट अफस्पिन बलर र प्रभावशाली फिल्डर हुन्।
दीपेन्द्र सिंह ऐरीको नाममा विश्व कीर्तिमान पनि दर्ज छन्। टी-२०आई क्रिकेटमा उनले ९ बलमै अर्धशतक प्रहार गर्ने विश्व कीर्तिमान बनाएका छन्। सन् २०२३ मा एसियन गेम्समा मंगोलियाविरुद्ध उनले यो कीर्तिमान बनाएका थिए, जहाँ उनले लगातार ६ बलमा ६ छक्का प्रहार गरेका थिए। सन् २०२४ मा एसीसी प्रिमियर कपमा कतारविरुद्ध पनि उनले एकै ओभरमा ६ छक्का प्रहार गर्दै दुर्लभ कीर्तिमान बराबरी गरेका थिए।
सन् २०१८ मा टी-२०आई र सोही वर्ष ओडिआईमा डेब्यु गरेका दीपेन्द्रले हालसम्म ९४ टी-२०आई खेलमा १ शतक र १२ अर्धशतकसहित २ हजार १२५ रन तथा ६० विकेट लिएका छन्। यता, ६८ ओडिआईमा १ शतक र ५ अर्धशतकसहित १ हजार २४१ रन तथा ४२ विकेट लिएका छन्। पाकिस्तान सुपर लिग, ग्लोबल टी-२० क्यानडा र आईएल टी-२० यूएई लगायतका अन्तर्राष्ट्रिय फ्रेन्चाइज लिगमा उनको सहभागिताले खेल अनुभवलाई थप विस्तार गरेको छ।
