जेठ १६, २०८३ शनिबार
सुनसरी : खोटाङ, ओखलढुंगा र उदयपुर जिल्लाहरूलाई जोड्ने गरी सुनकोशी र दूधकोशी नदीको संगमस्थल ज्योर्तिघाटमा दुईवटा महत्वपूर्ण झोलुङ्गे पुल निर्माण भई सञ्चालनमा आएका छन्। यी पुलहरूको निर्माणसँगै तीनवटै जिल्लाबीचको आवतजावत उल्लेख्य रूपमा सहज भएको छ। यसले यस क्षेत्रको पर्यटन विकास, व्यापार विस्तार र समग्र स्थानीय आर्थिक गतिविधिमा महत्वपूर्ण योगदान पुर्याउने अपेक्षा गरिएको छ।
खोटाङको हलेसी तुवाचुङ नगरपालिका–१ ठुलढुङ्गा, ओखलढुंगाको मानेभञ्ज्याङ गाउँपालिका–६ हिलेपानी र उदयपुरको कटारी नगरपालिका–१४ लेखानीलाई सिधा जोड्ने गरी यी दुई झोलुङ्गे पुल निर्माण गरिएका हुन्। हलेसी तुवाचुङ नगरपालिकाकी मेयर बिमला राईले पुल सञ्चालनले तीन जिल्लाका नागरिकलाई ठूलो राहत मिलेको बताएकी छन्। उनका अनुसार, यसले धार्मिक तथा प्राकृतिक पर्यटनको प्रवर्धन, स्थानीय उत्पादनको सहज बजारीकरण र समग्र आर्थिक क्रियाकलापको विस्तारमा निर्णायक भूमिका खेल्नेछ।
मानेभञ्ज्याङ गाउँपालिका–४ का वडाध्यक्ष विष्णु तामाङले विगतमा वर्षायाममा नदी तर्नुपर्दा विद्यार्थी, किसान र व्यापारीहरूले भोग्नुपरेको असहजता अब अन्त्य भएको र प्रत्यक्ष लाभ पुगेको उल्लेख गरे। सस्पेन्सन ब्रिज डिभिजन, पुलचोक, ललितपुरका योजना प्रमुख शंकर बुढाथोकीले यी झोलुङ्गे पुलहरूले सुरक्षित आवागमन सुनिश्चित गर्दै शिक्षा, स्वास्थ्य, कृषि तथा व्यापारिक गतिविधिमा सकारात्मक प्रभाव पार्ने विश्वास व्यक्त गरेका छन्।
२०७९ साउन ६ गते सस्पेन्सन ब्रिज डिभिजन र निर्माण कम्पनी श्री अपर तामाकोशी-जे.के. जेभीबीच सम्झौता भई जटिल भौगोलिक अवस्थाका बाबजुद यी पुलहरूको निर्माण कार्य सम्पन्न गरिएको हो। खोटाङ र ओखलढुंगा जोड्ने पुल १३४ मिटर लामो छ भने ओखलढुंगा र उदयपुर जोड्ने पुलको लम्बाई १७८ मिटर रहेको छ। दुवै पुलको कुल लम्बाई ३१२ मिटर पुगेको छ। राष्ट्रिय गानका रचनाकार तथा यस पुल निर्माणका प्रमुख पहलकर्ता प्रदीपकुमार राई ‘व्याकुल माईला’ का अनुसार, यी दुई पुल निर्माणका लागि करिब ३ करोड ३१ लाख रुपैयाँ लागत लागेको छ।
पुलको औपचारिक उद्घाटन खोटाङका पूर्व सांसद टंक राई र ओखलढुंगाका जिल्ला समन्वय समिति प्रमुख टेकराज भट्टराईले संयुक्त रूपमा गरेका थिए। पुल सञ्चालनमा आएसँगै ज्योर्तिघाट क्षेत्र नयाँ पर्यटकीय गन्तव्यका रूपमा विकसित हुँदै गएको छ। स्थानीय बासिन्दाका अनुसार, सुनकोशी–दूधकोशी संगमस्थल र आसपासको मनमोहक प्राकृतिक सौन्दर्यको अवलोकन गर्न अहिले दैनिक रूपमा ठूलो संख्यामा आन्तरिक तथा बाह्य पर्यटकहरू पुग्न थालेका छन्। तीन जिल्लाको संगम क्षेत्रमा निर्मित यी पुलहरूले यस क्षेत्रमा विकासको नयाँ सम्भावनाको ढोका खोलेको, सामाजिक एकतालाई सुदृढ गरेको र समग्रमा एक नयाँ सेतुको निर्माण गरेको मानिएको छ। यसले दीर्घकालमा यस क्षेत्रको समग्र जीवनस्तर उकास्न मद्दत पुग्ने अपेक्षा गरिएको छ।
