जर्मन टोलीको पराजयपछि प्रशंसकहरू
तस्बिर स्रोत, EPA/Shutterstock
जर्मनी विश्वकपबाट बाहिरियो: पाराग्वेसँग पेनाल्टीमा अप्रत्याशित हार
चार पटकको विश्व विजेता जर्मनी विश्वकप फुटबल प्रतियोगिताबाट अप्रत्याशित रूपमा बाहिरिएको छ। सोमबार राति सम्पन्न राउन्ड अफ ३२ को खेलमा फिफा वरियतामा आफूभन्दा ३१ स्थान तल रहेको पाराग्वेसँग पेनाल्टी शुटआउटमा पराजित भएपछि जर्मनीको यात्रा टुङ्गिएको हो। निर्धारित ९० मिनेट र अतिरिक्त समयमा १-१ को बराबरीपछि खेलको निर्णय पेनाल्टी शुटआउटबाट भएको थियो, जहाँ जर्मनी पहिलो पटक विश्वकप प्रतियोगितामा पेनाल्टीमा पराजित भयो।
खेलको ४२औँ मिनेटमा पाराग्वेका जुलियो एन्सिसोले गोल गर्दै टोलीलाई अग्रता दिलाएका थिए। तर, दोस्रो हाफमा जर्मनीले सुधारिएको प्रदर्शन गर्दै ५४औँ मिनेटमा आर्सनलका फर्वार्ड काइ ह्याभर्जको गोलमार्फत खेल बराबरीमा ल्यायो। पाराग्वेले बलियो रक्षापंक्ति देखाउँदै जर्मनीलाई थप गोल गर्न दिएन, जसले गर्दा खेल अतिरिक्त समय हुँदै पेनाल्टी शुटआउटमा धकेलियो।
पेनाल्टी शुटआउटमा जर्मनीका प्रमुख खेलाडी काइ ह्याभर्ज र न्यूक्यासलका निक वल्टमेड दुवै गोल गर्न असफल रहे। पाराग्वेका पनि दुई खेलाडीले गोल गर्न सकेनन्। छैटौँ प्रहारमा जर्मनीका जनाथन टाहले बल पोस्टमाथि प्रहार गरेर मौका गुमाए, जबकि पाराग्वेका होजे कनालले निर्णायक गोल गर्दै आफ्नो टोलीलाई ऐतिहासिक जित दिलाए। यो हारसँगै जर्मनीले कुनै महत्त्वपूर्ण प्रतियोगितामा पेनाल्टी शुटआउट गुमाएको सन् १९७६ को युरोपेली च्याम्पिअनशिप फाइनलमा चेकोस्लोभाकियासँग पराजित भएपछिको यो पहिलो घटना हो।
सन् १९५४, १९७४, १९९० र २०१४ मा विश्वकपको उपाधि जितेको जर्मनीका लागि पछिल्ला संस्करणहरू सुखद रहेका छैनन्। सन् २०१८ र २०२२ दुवैमा समूह चरणबाटै बाहिरिएको जर्मनी यसपालि अन्तिम ३२ बाटै अप्रत्याशित रूपमा घर फर्किनुपरेको छ। समूह चरणमा अमेरिका विरुद्ध ४-१ को हार भोगेको र समूह ‘डी’ बाट तेस्रो स्थानमा रहँदै अन्तिम ३२ मा प्रवेश गरेको पाराग्वेका लागि यो जित ठूलो उपलब्धि हो। अब पाराग्वेले शनिबार हुने अन्तिम १६ को खेलमा फ्रान्स वा स्वीडनमध्ये एकसँग प्रतिस्पर्धा गर्नेछ।
तस्बिर स्रोत, Reuters
ब्रजिलको अन्तिम १६ मा स्थान सुरक्षित, जापान पराजित
सोमबार राति सम्पन्न अर्को रोमाञ्चक खेलमा पाँच पटकको विश्व विजेता ब्रजिलले जापानलाई २-१ गोल अन्तरले पराजित गर्दै प्रतियोगिताको अन्तिम १६ मा आफ्नो स्थान सुरक्षित गरेको छ।
खेलको पहिलो हाफमा जापानले उत्कृष्ट प्रदर्शन गर्दै २९औँ मिनेटमा काइशु सानोको गोलमार्फत अग्रता लिएको थियो। तर, दोस्रो हाफमा ब्रजिलले खेलमा पकड जमायो र ५६औँ मिनेटमा क्यासेमिरोले गोल गर्दै खेल बराबरीमा ल्याए। निर्धारित समयमा खेल १-१ को बराबरीमा रहेपछि थपिएको समयमा ९५औँ मिनेटमा ग्याब्रिअल मार्टिनेलीले निर्णायक गोल गरेपछि जापान पराजित हुन पुग्यो।
ब्रजिलले सन् १९५८, १९६२, १९७०, १९९४ र २००२ मा गरी पाँच पटक विश्वकप उपाधि जितेको छ। टोली यसपटक पनि उपाधिको प्रबल दाबेदारका रूपमा अगाडि बढेको छ। अन्तिम १६ को चरणमा ब्रजिलले नर्वे र आइभोरी कोस्टबीचको खेलको विजेतासँग प्रतिस्पर्धा गर्नेछ।
