संयुक्त अरब इमिरेट्स (यूएई) मा हालै भएका आक्रमणपछि त्यहाँ कार्यरत हजारौं नेपालीहरूमा सुरक्षा र भविष्यको चिन्ता बढेको छ। विशेषगरी आबुधाबीमा इरानी ड्रोन आक्रमणमा एक जना नेपाली नागरिकको मृत्यु भएपछि यो त्रास थपिएको हो। यद्यपि, यूएई सरकारले आफ्ना नागरिक र त्यहाँका बासिन्दाहरूको सुरक्षालाई उच्च प्राथमिकतामा राखेको जनाएको छ।
तस्बिर स्रोत, Getty Images
यूएई सरकारले आफ्ना नागरिक, आफ्नो देशमा बसोबास गर्ने अन्य व्यक्ति र आगन्तुकहरूको सुरक्षालाई उच्च प्राथमिकता राखिएको बताएको छ।
आबुधाबीमा सुरक्षागार्डको रूपमा कार्यरत बुटवलका आकाश खनालले सोमबार दिउँसो विस्फोटनको ठूलो आवाज सुनेको बताए। उनका अनुसार बिहान पनि यस्तै आवाज सुनिएको थियो। यद्यपि, सरकारले इरानी प्रहारको प्रतिरक्षा गर्दै आएको बताए पनि अनिश्चितकालीन आक्रमणको डरले मनमा त्रास पैदा गराएको उनको भनाइ छ। यूएई सरकारले घरबाटै काम गर्न आग्रह गरे पनि उनी आफ्नो ड्युटीमै खटिएका छन्। “प्राकृतिक विपद् भए त सुरक्षित ठाउँमा जान सकिन्थ्यो, तर यो त कहाँबाट कति बेला कहाँ आउँछ भन्ने थाहा हुँदैन,” खनालले भने, “नेपाली साथीबारे दुःखद खबर आएपछि कतिपय साथीहरूमा चिन्ता र डर पक्कै छ।”
आक्रमणमा मारिएका तीन विदेशीमध्ये एक जना नेपाली नागरिक गोरखाका २९ वर्षीय दिवस श्रेष्ठ हुन्। उनी आबुधाबीस्थित जायाद अन्तर्राष्ट्रिय विमानस्थल क्षेत्रमा कार्यरत थिए र ड्रोन निष्क्रिय पार्ने क्रममा उनको मृत्यु भएको बताइएको छ। मृतक अन्य दुई जनामा पाकिस्तान र बाङ्ग्लादेशका नागरिक छन्। यूएई सरकारले नेपाली राजदूतावासमार्फत नेपाल सरकारलाई यस विषयमा जानकारी गराएको छ र परिस्थिति सहज भएपछि श्रेष्ठको शव स्वदेश फिर्ता गरिने दूतावासले जनाएको छ।
तस्बिर स्रोत, Reuters
शनिवार जेबेल अली बन्दरगाहसहित दुबईका कैयौँ क्षेप्यास्त्र तथा ड्रोन हमलाको प्रतिरोध गरिएको अधिकारीहरूले बताएका छन्।
यसैबीच, दुबईमा १० वर्षदेखि कार्यरत अमरगढी डडेलधुराका सिद्धार्थ खड्काले भने त्यहाँ अवस्था सामान्य रहेको बताएका छन्। बुर्ज खलिफानजिकै बस्ने उनले इरानमाथिको आक्रमण र प्रत्याक्रमणको दिन मानिसहरू डराए पनि अहिले सुपरमार्केट, सार्वजनिक यातायात र रेस्टुरेन्टहरू सामान्य रूपमा सञ्चालन भइरहेको जानकारी दिए। सरकारले बुधवारसम्म सकेसम्म घरबाटै काम गर्न सूचना जारी गरे पनि डराउनुपर्ने अवस्था नभएको उनको अनुभव छ। यद्यपि, हवाई उडानहरू भने बन्द छन्।
नेपाल सरकारले यूएईको विकसित घटनाक्रमलाई सूक्ष्म रूपमा नियालिरहेको प्रधानमन्त्री सुशीला कार्कीले बताएकी छन्। सोमबारको सम्बोधनमा उनले मध्यपूर्वमा रहेका नेपालीको सुरक्षा सरकारको ठूलो चासोको विषय भएको र हरेक नागरिकको व्यक्तिगत सुरक्षा र हितको रक्षामा सरकार कटिबद्ध रहेको प्रतिबद्धता व्यक्त गरिन्। नेपाली राजदूतावास आबुधाबीकी प्रवक्ता तथा उपनियोग प्रमुख रञ्जिता दाहालले त्यहाँ रहेका नेपालीहरूबाट २००-३०० फोन र सन्देश प्राप्त भएको जानकारी दिइन्। कसैले सामान्य सोधपुछका लागि सम्पर्क गरेको र कोही आत्तिएर फोन गरेको भए पनि यूएईको प्रतिरक्षा प्रणाली बलियो भएकाले धेरै त्रासदीपूर्ण अवस्था नदेखिएको उनको भनाइ छ। अहिलेसम्म कुनै नेपालीले ठूलै समस्यामा परेर दूतावासको सहयोग नमागिएको पनि उनले स्पष्ट पारिन्।
akashkhanal/facebook
आबुधाबीमा कार्यरत आकाश खनालका अनुसार, भर्खरै खर्च गरेर यूएई पुगेका नेपालीहरूलाई नफर्किँदा जोखिम र फर्किँदा गरेको खर्चको चिन्ता छ। तत्काल स्वदेश फर्किन सक्ने वा सरकारले फर्काउन सक्ने सम्भावना कम देखिए पनि धेरैको चाहना परिवारसँगै बस्ने रहेको उनको भनाइ छ। रुस र युक्रेनको लडाइँ जस्तै यो द्वन्द्व पनि कति लामो हुन्छ भन्ने अनिश्चितताले चिन्ता थपेको खनालले बताए।
siddharthkhadka/facebook
गैरआवासीय नेपाली सङ्घ (एनआरएनए) का प्रमुख कार्यकारी अधिकृत राजेन्द्र राउतले मध्यपूर्वका विभिन्न देशहरूमा कार्यरत नेपालीहरूमा त्रास र संशय बढेको जानकारी प्राप्त भएको बताए। एनआरएनएले नेपालीहरूको चिन्ता र सरोकार सम्बोधनबारे सरकार र आफ्ना संयन्त्रहरूसँग समन्वय गरिरहेको छ। परिवर्तित अवस्थालाई ध्यानमा राख्दै वैदेशिक रोजगार विभागले साउदी अरेबिया, यूएई, कुवेत, कतार, बहरेन, ओमान, इराक, यमन, लेबनन, टर्की, जोर्डन र इजरायल समेतका देशहरूका लागि व्यक्तिगत र संस्थागत श्रम स्वीकृति स्थगित गरेको छ। वैदेशिक रोजगार विभागका उपमहानिर्देशक तथा प्रवक्ता चन्द्रबहादुर शिवाकोटीले चिन्ता व्यक्त गर्दै कसैले सीधै विभागलाई सम्पर्क गरिसकेका भने छैनन्।
तस्बिर स्रोत, RSS
