काठमाडौँ, कात्तिक १४ गते । बुद्धिचाल खेलको विकास, प्रतिभा पहिचान तथा खेलाडीको प्रतिस्पर्धात्मक क्षमता अभिवृद्धिका लागि काठमाडौँको साँखुमा ‘खुला फिडे र्यापिड रेटिङ बुद्धिचाल प्रतियोगिता–२०८३’ सुरु भएको छ । ज्यापू महागुथि नेपाः सक्वको आयोजनामा शनिबारदेखि आरम्भ भएको यस प्रतियोगिताको शंखरापुर नगरपालिकाका नगरप्रमुख रमेश नापितले औपचारिक उद्घाटन गर्नुभएको छ ।
बुद्धिचालको आधारभूत विकास र नवप्रतिभालाई प्रोत्साहन गर्ने लक्ष्यका साथ आयोजित यो प्रतियोगिता फिडे इभेन्ट कोड ५०६१३१ अन्तर्गत सञ्चालन भइरहेको छ । प्रतियोगितामा देशभरका १०१ जना खेलाडीहरूले सहभागिता जनाएका छन् । विशेषगरी, दुई हजारभन्दा कम फिडे रेटिङ भएका खेलाडीहरूलाई लक्षित गरी आयोजना गरिएको यस प्रतियोगिताले उनीहरूको खेल कौशललाई तिखार्न र उच्चस्तरीय प्रतिस्पर्धाको अनुभव दिलाउन महत्वपूर्ण भूमिका खेल्ने आयोजकले जनाएको छ । मुख्य संयोजक रामकृष्ण सिं डंगोलका अनुसार, वि.सं. २००९ सालमा नेपालमा पहिलो बुद्धिचाल प्रतियोगिता सञ्चालन भएको ऐतिहासिक सम्झनालाई कायम राख्न यो प्रतियोगिता आयोजना गरिएको हो ।
दुई दिनसम्म चल्ने यस प्रतियोगितामा स्विस प्रणालीका आधारमा नौ चरणका खेलहरू सञ्चालन गरिनेछन् । प्रत्येक खेलका लागि १० मिनेटको मुख्य समय र प्रत्येक चालमा १० सेकेन्ड अतिरिक्त समय थप हुने ‘टाइम कन्ट्रोल’ निर्धारण गरिएको छ । मुख्य संयोजक डंगोलका अनुसार, यो समय निर्धारणले खेलाडीहरूको रणनीतिक सोच, निर्णय क्षमता, धैर्यता र समय व्यवस्थापनको सीप परीक्षण गर्नेछ, जुन र्यापिड चेसको आधारभूत विशेषता हो ।
प्रतियोगितामा उत्कृष्ट प्रदर्शन गर्ने २५ जना खेलाडीलाई कुल १ लाख ७ हजार ५ सय रुपियाँ नगद पुरस्कार प्रदान गरिनेछ । खुलातर्फ प्रथम स्थान हासिल गर्ने खेलाडीले २० हजार, द्वितीयले १५ हजार, तृतीयले १० हजार, चौथोले छ हजार र पाँचौँ स्थानका खेलाडीले पाँच हजार रुपियाँ प्राप्त गर्नेछन् । यस्तै, छैटौँदेखि दशौँ स्थानसम्मका खेलाडीहरूलाई जनही तीन हजार रुपियाँको पुरस्कारको व्यवस्था गरिएको छ ।
खुला श्रेणीका अतिरिक्त, प्रतियोगितामा विभिन्न वर्गका खेलाडीहरूलाई प्रोत्साहन गर्न छुट्टाछुट्टै पुरस्कारको व्यवस्था गरिएको छ । यसमा स्थानीय खेलाडी, महिला खेलाडी, १६ वर्षमुनिका स्थानीय खेलाडी, फिडे रेटिङ नभएका (अनरेटेड) खेलाडी र ५५ वर्षमाथिका भेट्रान खेलाडीहरू समावेश छन् । यसका साथै, १४, १२ र १० वर्षमुनिका बाल खेलाडीहरू तथा विभिन्न रेटिङ समूहमा प्रतिस्पर्धा गर्ने खेलाडीहरूलाई पनि पुरस्कृत गरिनेछ । एउटै खेलाडी एकभन्दा बढी विधामा पुरस्कृत हुने अवस्था आएमा, सबैभन्दा बढी रकमको पुरस्कार मात्र प्रदान गरिनेछ, डंगोलले स्पष्ट पार्नुभयो ।
प्रतियोगिताको सुचारु सञ्चालन तथा निर्णायक व्यवस्थापनको जिम्मेवारी अन्तर्राष्ट्रिय आर्बिटर ज्ञानेन्द्र खाइजुले कुशलतापूर्वक सम्हाल्नुभएको छ । उहाँलाई कुमार महर्जन, सानुराजा बज्राचार्य र शान्ति धिमालले सहायक आर्बिटरका रूपमा सहयोग गरिरहेका छन् ।
शंखरापुर नगरपालिकाको आर्थिक सहयोग तथा सम्बन्धित खेल संस्थाहरूको सहकार्यमा आयोजित यो प्रतियोगिताले स्थानीयस्तरमा बुद्धिचाल खेलप्रतिको आकर्षण बढाउनुका साथै नयाँ र उदीयमान प्रतिभाहरूलाई राष्ट्रिय तथा अन्तर्राष्ट्रियस्तरमा प्रतिस्पर्धा गर्ने उत्कृष्ट अवसर प्रदान गर्ने अपेक्षा गरिएको छ । आयोजक समितिका अध्यक्ष किच सिं डंगोलले यस्ता प्रतियोगिताले नेपाली बुद्धिचालको विकासमा महत्वपूर्ण योगदान पुर्याउने विश्वास व्यक्त गर्नुभयो ।
प्रतियोगिताका अन्तिम चरणका खेलहरू कात्तिक १५ गते आइतबार सोही स्थानमा सञ्चालन हुनेछन् । सोही दिन प्रतियोगिताको नतिजा सार्वजनिक गरिनेछ र विजयी खेलाडीहरूलाई भव्य समारोहका बिच पुरस्कार वितरण गरिने जनाइएको छ ।
