कात्तिक ३, २०८३ मंगलबार १४:३९:१०
तानसेन: बडादसैंको महानवमीका अवसरमा पाल्पा जिल्लाभरका प्रमुख शक्तिपीठ तथा देवीका मठमन्दिरहरूमा भक्तजनहरूको उल्लेख्य घुइँचो लागेको छ। परम्परागत रूपमा शक्तिकी देवी भगवतीको पूजा-आराधना गरिने यस विशेष दिनमा जिल्लाका विभिन्न धार्मिक एवं ऐतिहासिक स्थलहरूमा बिहानैदेखि भक्तजनहरूको चहलपहल बढेको हो।
महानवमीको पावन अवसरमा पाल्पाको तानसेनस्थित प्रसिद्ध भगवती मन्दिर, भैरवस्थान, रम्भापानी, दर्लामडाँडा र रैनादेवी लगायतका प्रमुख शक्तिपीठहरूमा विशेष पूजापाठ गरिएको छ। यी स्थानहरूमा दर्शनार्थीहरूले देवीको आराधना, जमरा चढाउने कार्य र भजनकीर्तनमा सहभागिता जनाएका छन्। भक्तजनहरूको बाक्लो उपस्थितिले धार्मिक वातावरण थप भक्तिमय बनेको देखिन्छ।
यस दिन भक्तजनहरूले घरमा उमारेको जमरा देवी-देवताका मन्दिर, कोतघर तथा शक्तिपीठहरूमा विधिपूर्वक चढाउने गर्दछन्। जमराका अतिरिक्त देवीलाई वस्त्र, डोरो, चुरा, काँइयो, सिन्दूर र टीका लगायतका पवित्र सामग्रीहरू चढाउने प्रचलन रहिआएको छ। नवदुर्गाको विशेष दिन महानवमीमा शक्तिपीठहरूमा बोका, हाँस, कुखुरा र राँगाको बलि दिने परम्परा पनि कायम छ। देवीलाई बलि प्रदान गर्दा मनोकामना पूरा हुने जनविश्वास रही आएको छ।
जिल्लाका विभिन्न कोतघरहरूमा पनि महानवमीका अवसरमा हर्षबढाइँसहित विशेष पूजाआजा गरिएको छ। नेपाली सेनाले तानसेनस्थित निशान घरमा परम्पराअनुसार निशान भगवतीको पूजा आराधना गरेको छ। यसैगरी, ऐतिहासिक दसैँघरमा पनि विधिपूर्वक पूजापाठ सम्पन्न गरिएको छ। नेपाली सेनाद्वारा गरिने यो पूजाले महानवमीको धार्मिक तथा सांस्कृतिक महत्त्वलाई थप उजागर गर्दछ।
गाउँ-गाउँका देवी मन्दिरहरूमा पनि पूजाआजा गर्ने र बलि दिने भक्तजनहरूको बाक्लो उपस्थिति देखिएको छ। दसैँको पर्व मनाउन स्वदेश तथा विदेशबाट मान्यजन एवं आफन्तको हातबाट टीका थाप्न घर फर्किने क्रम बढेकाले यस वर्ष ग्रामीण भेगका मठमन्दिर तथा गाउँघरहरूमा विगतको तुलनामा निकै बढी चहलपहल देखिएको छ। सुनसान प्रायः रहने गाउँबस्तीहरू दसैँको रौनकले गर्दा फेरि गुल्जार बनेका छन्।
यस वर्षको महानवमीमा पाल्पाका शक्तिपीठहरूमा भक्तजनको अपार आस्था र उत्साह देखिएको छ, जसले नेपाली समाजमा दसैँ पर्वको धार्मिक एवं सांस्कृतिक महत्त्व अझै गहिरो रहेको पुष्टि गर्दछ।
