चीनमा एक साताभित्रै आएको दोस्रो शक्तिशाली समुद्री आँधी ‘बाभी’का कारण यसको मार्गमा पर्ने क्षेत्रहरूबाट करिब २० लाख मानिसहरूलाई सुरक्षित स्थानमा सारिएको छ। यो आँधी सबैभन्दा फराकिलो ठाउँमा १,००० किलोमिटरसम्म फैलिएको छ, जुन फ्रान्सको चौडाइ बराबर मानिन्छ। यसको विशालताले यसको सम्भावित विध्वंसकारी क्षमतालाई उजागर गर्छ।
शनिवार साँझ तटीय सहर ताइझोउमा पहिलो पटक बज्रिएको बाभीले त्यसपछि मध्यरातमा वेन्झोउमा दोस्रो पटक धक्का दिएको थियो। यसअघि, बाभीले दुर्गम जापानी टापुहरूमा प्रहार गर्दै ताइवानमा भारी वर्षा निम्त्याएको थियो। बाभी ताइवानको उत्तरी छेउ हुँदै अघि बढेको थियो। फिलिपिन्समा गएको पहिरोमा यस आँधीका कारण कम्तीमा १७ जनाको मृत्यु भएको थियो।
मौसमविद्हरूको विश्लेषण अनुसार, कमजोर हुँदै चरम उष्णदेशीय आँधीमा परिणत भए तापनि यसको ‘वर्षा ब्यान्ड’ भित्र ठूलो मात्रामा हुने आर्द्रताका कारण यसले अझै पनि व्यापक जोखिम निम्त्याउने सम्भावना रहेको छ।
तस्बिर स्रोत, Reuters
असर
उत्तर-पश्चिमतर्फ सर्दै जाने क्रममा सो समुद्री आँधीको वेग बिस्तारै कम हुने अपेक्षा गरिए पनि यसको प्रभाव व्यापक रहेको छ। चिनियाँ सरकारी सञ्चारमाध्यमहरूका अनुसार, आँधीको मुख्य हिस्सा आइतवार बिहान जजियाङ प्रान्तको हाङझोउ सहरमा पुगेको थियो।
जजियाङ प्रान्तबाट मात्रै १७ लाखभन्दा धेरै मानिसहरूलाई सुरक्षित स्थानमा सारिएको छ भने अन्य छिमेकी प्रान्तहरूमा पनि हजारौँको सङ्ख्यामा मानिसहरूलाई स्थानान्तरण गरिएको छ। जजियाङमा विद्यालय, कार्यालय र बाहिरी गतिविधिहरूमा रोक लगाइएको छ। साथै, ४०० भन्दा बढी उडान र दर्जनौँ रेल सेवाहरू रद्द गरिएका छन्, जसले जनजीवनमा ठूलो असर पारेको छ।
तस्बिर स्रोत, Getty Images
आँधीको बाटो नजिकै पर्ने करिब १ करोड मानिसहरू बसोबास गर्ने वेन्झोउ सहरमा अधिकारीहरूले लाखौँ मानिसहरूलाई सुरक्षित ठाउँमा सार्न आदेश दिएका थिए। वेन्झोउका एक बासिन्दा ली लियाङसिङले रोयटर्ससँग कुरा गर्दै भने, “हामीले छानाको टायल र रूखका हाँगाहरू खसेको आवाज सुन्न सक्यौँ। हामी साँच्चै डरायौँ।” राजधानी बेइजिङले समेत सम्भावित जोखिमबाट बच्नका लागि १ लाख मानिसहरूलाई सुरक्षित ठाउँमा सार्ने आदेश जारी गरेको अधिकारीहरूले बताएका छन्।
मौसम पूर्वानुमानकर्ताहरूका अनुसार, उक्त आँधी सोमवार पूर्वी एन्होय र मङ्गलवार शाङ्दोङ प्रायद्वीप हुँदै उत्तरी ‘यलो सी’मा सर्ने अनुमान गरिएको छ।
‘सुपर टाइफून’का रुपमा सुरु
टाइफून बाभी ‘सुपर टाइफून’को रूपमा गत सोमवार गुआम र उत्तरी मारियाना टापुहरूमा प्रतिघण्टा २९० किलोमिटरको अत्यधिक वेगमा ठोक्किएको थियो। प्रशान्त महासागर हुँदै अघि बढ्ने क्रममा यसले प्रतिघण्टा १४४ किलोमिटरको गतिमा हावा पैदा गरेको थियो। यसपछि देशका मुख्य टापुहरू र जापानको रियुक्यु टापुहरूको समूह रहेको साकिशिमा टापुहरूमा ठोक्किँदा कम्तीमा पाँच जना घाइते भएका थिए भने हजारौँ मानिसहरू बिजुलीविहीन बन्न पुगेका थिए।
ताइवानमा यसको सिधा मार नपरे तापनि, भारी वर्षाका कारण पहिरोको खतरा बढेकोले हजारौँ मानिसहरूलाई आफ्नो घर छोड्न बाध्य पारिएको थियो। ताइवानी अधिकारीहरूले बाभीले १ मिटरसम्मको वर्षा गराउन सक्ने चेतावनी जारी गरेका थिए। दर्जनौँ उडानहरू रद्द गरिएका छन् भने विद्यालयहरूले यस क्षेत्रभरि पठनपाठन स्थगित गरेका छन्। स्थानीय बासिन्दाहरूले खानेकुरा घरमा भण्डारण गर्न थालेपछि सुपरमार्केटहरू रित्तिँदै गएका दृश्यहरू देखिएका छन्।
तस्बिर स्रोत, Reuters
दक्षिणी चीनका केही भागहरू गत साताको सुरुमा आएको मेसाक समुद्री आँधीले सिर्जना गरेको विनाशबाट अझै पनि पूर्ण रूपमा मुक्त हुन सकेका छैनन्। मेसाकले निम्त्याएको विपद्मा परेर कम्तीमा ३९ जनाको मृत्यु भएको थियो। यसले कृषि क्षेत्रमा ठूलो क्षति पुर्याउनुका साथै ठूलो सङ्ख्यामा जनावरहरूको ज्यान लिएको थियो। यसबाहेक, मध्य हुबे प्रान्तमा दुई दुर्लभ आँधीबेहरी पनि सिर्जना गरेको थियो।
